يــــا الوطن (شعر شعبي)

المختار المختاري 'الزاراتي'

كتبت  سنة 1994 حين تعرفت على الشخص الذي وشى بي لأمن الدولة حول حملي للسلاح في حرب 1991 ببغداد وكان موقفا أعتز به رغم كل الذي قاسيت وكان هذا الواشي من بين الطلبة الدارسين بالعراق لذا قلت فيه وله ولغيره:

*شقيت موج البحر بعيوني

وناديت على النخلات لا تنسوني

وعمّرت في لأيام اللي خانوني

ساير في عجب برّ مالقيت ليه نهاية

قصاف لأيام إللي كدروني

ما قدروا غير على زهوتي وغنايا

شقيت موج البحر بكفوفي

وويلي من الخوان اه يا خوفي

لو كان قلبي الفارس موش سخوفي

نركب عليه الموت في كلّ الثنايا

لكن للأيام تركت حروفي

تنبي على نذالته العاقل وهو مشكايا

*تنبيه علّي واطي

وعلّي من أصله راسي مطاطي

وعلّي رحل ما فاد فيه عياطي

ركب راسه والحمرا الجرايا

ترك غيرا في خيرا يهطّي

وفي برّنا قداش كثرت الهطايا

تركهم ياسر

وما صبت فيهم رابح والاّ خاسر

جرت بيهم سنين كواسر

ورياح سموم جاحدة كوّايا

تعجب يا عقل من سواعد خيرها ياسر

وعايشة في ذلّ ظهورها حنايا

يا هالوطن مرحبا بعذابك

ويا مرحبا باللي يقولوا صحابك

سنين صابر على ما صابك

سنين وحدي عايم في حمل بلايا

وقتاش يا هالوطن يقيسوا حسابك

والاّ قبل هاليوم تخطفني المنايا

*يا هالوطن يا مرحبا بيهم

ويا مرحبا حتى بأوّل صغيّر فيهم

زمان صابر على ماضيهم

زمان خاين مالقيت ليه غاية

غير الهزايم دايرة

وتدور عليهم

وغير النكايد ودموع الصبايا

*وغير قلبي السكران بدمّ تراب لياليهم

وغير عمري إللّي مضا  نخزّن في الخطايا

يا وطن .../...